Lara teme especialmente algunhas visitas na súa xornada: as mulleres vellas que viven soas e apenas teñen familia, que non se levan con ela ou lles vive lonxe e non gardan máis trato que o das chamadas telefónicas da fin de semana. É luns e o outono en Faro semella coma os de antes: húmido, ventoso, impaciente. Beirarrúas estreitas e coches montados nelas. Paraugas rotos nos contedores, bolsas do Día ciscadas polo chan, casas de apostas, de compro ouro.